Priz ar Yaouankiz 2018

Gourc’hemennoù da Ilan KERVOAS-LE NABAT ha Sulian LE BOZEC-CHIFFOLEAU evit an eil priz o deus gouniet evit Teñzorioù !

Ha setu ul liamm da heuliañ evit gouiet mennoz ul lennerez àr al levr : A! Lenn…

Teñzorioù

 

Advertisements

Devezh liamm 3vet-lise

Digwener 18/05 e oa bet aozet un devezh eskemm etre ar re 3vet hag al liseidi. Skolidi Henri Wallon o deus kejet get liseidi Jean Macé evit un devezh plijus e Monteneg (35). Bet omp bet é welet kastell Tresaozon e-lec’h oa bet ijinet an istor skrivet get Alice Luron (Klas Termen) hag embannet get Keit Vimp Bev el levr Rederien-mor.rederien-mor

Ha goude-se hon eus pourmenet el lec’h arkeologel Monteneg, hentet get Serj Ar Bozeg, kelennour istor-geografiezh el lise. War-lerc’h ar pik-nik e-mesk ar peulvanoù, hon eus tremenet an endervezh e Auberge des Voyajoueurs lec’h ma vez kinniget 800 c’hoari a bep seurt d’an dud ! Peadra de dremen ur prantad dispar evit ober anaoudegezh ha gober bourrapl !

Keuz hon eus ne oant ket daet skolidi Kewen ha Ploue hag a oa bet kouviet d’an devezh-mañ ivez.

Chomadenn e Treger-Gouello

 

Pevar devezh o deus tremenet al liseidi e Treger-Gouello ha chañs vras hon eus bet get amzer flour an nevez-hañv. Lojiñ a raemp e maner Kerhir e Tredarzeg. Kaer e oa al lec’h ha degemerus-tre an dud.

Bet omp bet é vale àr Enez Vriad hag ur bourmenadenn àr vag hon eus graet àr ur zodiac. Gleb tout e oamp e fin mes nag ur blijadur eo bet ! Brav-eston eo al lec’h.

Labouret hon eus ivez get ar podour Awen Prigent evit tañva al labour poderezh. Bourrapl-tre eo bet ha desket hon eus ober podoù hag o bravaat. Siwazh e vo ret deomp gortoz evit o c’havet rak ne vint ket prest e-raok fin miz Mae. Setu lec’hienn internet Awen : http://douarhatan.free.fr/

Setu ur video a zeskriv al labour poderezh hon eus graet :

klikit amañ

Hag evit echuiñ hon eus bizitet abati Boporzh. Interesant-tre oa ar bourmenadenn hentet ha brav-tre eo al lec’h. Dreist-holl er prantad-mañ ag ar blez get ar bokedoù a sklerijenn ar rivinoù.

A-drugarez da Goupaia hon eus videoioù a ziverr ar chomadenn :

burutelliñ (metodologiezh)

BURUTELLIÑ
Burutelliñ a sinifi reiñ ho soñj, ho meno,  àr un darvoud (sonadeg, film, abadenn…) pe un dra (levr, pladenn….).
Roll ar buruteller : sikour al lenner da ziviz eraok preniñ ul levr, ur bladenn, pe ur bilhed. Setu ar pezh en deus c’hoant gouiet al lenner :
– Ha plijet e vin get ar film-se ?
– Dleout a rahe din preniñ ar bladenn-mañ ?
– Hag emañ ar seurt levr a blijehe din ?

Paz kentañ : ar sujed
Ne vern peseurt tra eh oc’h é vont da vurutelliñ emañ ret komañs en ur reiñ titouroù d’al lenner. Da skouer, ma burutellit ur film e komañsoc’h en ur verraat an istoar. Emañ ret d’al lenner kaout an titouroù eraok evit bout gouest da gompren ar pezh a laroc’h goude. Titouroù a zleomp kavout e-barzh ur vurutelladenn :
– anv an oberour, ar skrivagnour
– an titl
– an aktourion pe an tudennoù
– lec’h ar sonadeg
– diverradenn an istoar

Eil paz : kariñ pe nompas kariñ
Evit burutelliñ emañ ret deoc’h kaout ur soñj àr ar sujed. Ho pal eo kendrec’hiñ an niver vrasañ a lennerion e talv ar boan mont da welet ar film en deus plijet deoc’h pe ne dalv ket ar boan da lenn ar romant ho peus kavet ken torr-penn. El lodenn-mañ e lâroc’h ma plij deoc’h pe ne blij ket deoc’h. Gwell eo ma kavit traoù da lârout e pep rummad : ar pezh a zo mat, ar pezh n’eo ket.

Trede paz : dielfenniñ
Pa vurutellit e tleit ivez dielfenniñ : klask a reoc’h neuze justifiiñ ar pezh a soñjit. E-giz-se ma lârit oc’h bet plijet get ar film e vo ret deoc’h displegiñ get petra oc’h bet ken plijet. N’eo ket awalc’h lârout « rak brav eo an istoar ». D’an tu kontrel, ma n’oc’h ket bet plijet, n’eo ket awalc’h lârout eo « nul ». Reiñ skouerioù a vo ret deoc’h evit poueziñ àr ar pezh a lâroc’h. Neuze e c’hellit kas munudoù a zisplego ar pezh a soñjit.

Pevare paz : kloziñ
En ur frazenn pe ziv e tiverrit ho meno amañ.

DULENN

Setu ni diskuizhet goude hon beaj da Zulenn hag an devezh-distro un tammig foll pand hon eus douaret e Pariz e-lec’h Naoned abalamour d’un harz-labour en aerborzh. Hiraet eo bet ar veaj neuze!

Petra hon eus graet neuze e-pad hon chomadenn e Dulenn ? Un droiad hentet e kreiz-kêr evit ober anaouedegezh get lec’hioù, tud ha darvoudoù brudet ar c’horn-vro ; bizitadenn Trinity College gant e levraoueg divent a lakae da soñjal e Poudlard, skol Harry Potter. Un diskouezadeg diàr arz ar skritur hag al levrioù er Grenn-amzer liammet get levr Kells ; ur bourmenadenn e Glendalough (Glen daou loc’h) a-hed al lennoù hag e kêriadenn gozh ar menec’h ; bizitadenn Dublin City Gallery e-lec’h e c’hellemp sellout doc’h taolennoù graet get livourion mil-vrudet el Monet pe Renoir ha livourion Iwerzhonat hag evel just troioù e Grafton street evit preniñ profoù ! Setu un neubeut skeudennoù ag hon avañturioù.

Marc’h al Lorc’h 2

Setu! Achu al labour ha lakaet ar bannoù-treset graet get al liseidi e mediaoueg Lann-ar-Stêr. Aze e chomint betek ar 25 a viz C’hwevrer. Dait niverus d’o gwelet!

Ha daet eo skolajidi 4vet ha 3vet Skolaj Henri Wallon d’o gwelet ha da gejiñ get Bertrand Galic evit un abadenn komz diàr ar vicher savour bannoù-treset. Interesant-tre mes re verr ar prantad evit kaout amzer da sevel an holl goulennoù.

Marc’h al lorc’h

Evit ar mare eh omp é labourat àr ur raktres awenet get oberenn Pêr-Jakez Helias, “Marc’h al lorc’h” hag al labour graet get Bertrand Galic ha Marc Lizano evit er lakaat e stumm ur vandenn-treset. Goude bout bet studiet buhez Pêr-Jakez Helias ha lennet testennoù tennet ag e levr er c’hlas hon eus dibabet a-strolladigoù un nebeut testennoù. Tremenet hon eus un devezh get Bertrand Galic evit sevel ur senario get an testennoù-se hag un devezh get Marc Lizano evit komañs an tresadennoù. Al labour a achuomp er c’hlas.

Prest vo evit an diskouezadeg a vo er vediaoueg Lann-ar-Stêr e miz c’hwevrer.

Deomp da Zulenn!

‘Benn un nebeut sizhunioù e vimp ‘barzh Dulenn! Pevar devezh e tremenimp du-se ha mall zo warnomp gweladenniñ Trinity College ha gwelet levr Kells, pourmen e Grafton Street hag e Stephen’s Green, bale e park naturel Wicklow.trinity-234504_640

Evit hon  skoazell e c’hellit kemer perzh en ur reiñ un nebeut gwenneien dre al lec’hienn Kengo.